വാടക വീട്ടിൽ നിന്നിറങ്ങേണ്ടി വന്നത് മമ്മൂക്ക കാരണം? സ്വന്തം കാര്യം നോക്കെന്ന് മമ്മൂക്ക പറഞ്ഞു: തെസ്‌നി ഖാന്‍
വളരെ ഓര്‍ത്തഡോക്‌സ് ആയിട്ടുള്ള ഒരു മുസ്ലീം കുടുംബത്തില്‍ നിന്നാണ് തെസ്‌നി ഖാന്‍ അഭിനയ ലോകത്തേക്ക് വരുന്നത്. അതിന്റെ കാരണം വാപ്പയാണ് എന്ന് തെസ്‌നി പറയുന്നു. ആനീസ് കിച്ചണ്‍ എന്ന ഷോയില്‍ പങ്കെടുത്ത് സംസാരിക്കവെയാണ് തന്റെ സിനിമാ പ്രവേശനത്തെ കുറിച്ചും, ജീവിതത്തെ കുറിച്ചും തെസ്‌നി ഖാന്‍ തുറന്ന് സംസാരിച്ചത്.
ഡാന്‍സിലും പാട്ടിലും എല്ലാം താത്പര്യമുള്ള ആളായിരുന്നു ഉമ്മ. പക്ഷെ കുടുംബ പശ്ചാത്തലം കൊണ്ട് അതൊന്നും മുന്നോട്ട് കൊണ്ടു പോകാന്‍ സാധിച്ചില്ല. മജീഷ്യനായ വാപ്പയെ കല്യാണം കഴിച്ചതിന് ശേഷം ഉമ്മ തന്റെ ആഗ്രഹങ്ങളെല്ലാം സാധിപ്പിച്ചു. വാപ്പയുടെ അസിസ്റ്റന്റ് ആയി ഷോയ്ക്ക് പോകുമ്പോള്‍ സ്‌റ്റേജില്‍ കയറാനും ഡാന്‍സ് ചെയ്യാനും ഒക്കെ സാധിച്ചു. വാപ്പയുടെ കുടുംബത്തില്‍ നിന്ന് വലിയ എതിര്‍പ്പുകള്‍ ഉണ്ടായിരുന്നുവെങ്കിലും, അതൊന്നും വാപ്പ മൈന്റ് ചെയ്തതേയില്ല.
ചെറുപ്പം മുതലേ കലയോടുള്ള എന്റെ താത്പര്യം മനസ്സിലാക്കിയ വാപ്പയും ഉമ്മയും അതിന് വേണ്ടി എന്നെ പ്രോത്സാഹിപ്പിച്ചു. എന്റെ ഡാന്‍സും ഷോകളും എല്ലാം അത്ര താത്പര്യത്തോടെയാണ് വാപ്പ ആസ്വദിച്ചിരുന്നത്. കൊച്ചിന്‍ കലാഭവനിലെ ഡാന്‍സ് ട്രൂപ്പില്‍ ചേര്‍ത്തത് എല്ലാം വാപ്പയാണ്. ഡെയ്‌സി എന്ന ചിത്രത്തിലൂടെ അഭിനയ ലോകത്തേക്ക് എത്തിയതും വാപ്പ നല്‍കിയ പിന്തുണ കൊണ്ട് മാത്രമാണ്.
സിനിമാ നായികയാകണം എന്ന സ്വപ്‌നമൊന്നും എനിക്കുണ്ടായിരുന്നില്ല. അന്നത്തെ നായികാ സങ്കല്‍പത്തിന് പറ്റിയ സൗന്ദര്യം എനിക്കില്ല എന്ന ഉത്തമബോധ്യം ഉണ്ടായിരുന്നു. എന്റെ കൂടെ വരുമാനം വന്നാല്‍ വീട്ടിലെ കാര്യങ്ങള്‍ നടന്ന് പോകും എന്ന ആശ്വാസം ആയിരുന്നു. വാടക വീട്ടിലാണ് താമസം. 160 രൂപ വാടക കൊടുത്താല്‍, എനിക്ക് കിട്ടുന്ന 2000 രൂപയാണെങ്കിലും വലിയ കാര്യമാണ്. വാപ്പയ്ക്കും വരുമാനം വരുന്നുണ്ട്, അതുകൊണ്ട് ലാവിഷ് ആയി ജീവിക്കാന്‍ കഴിയും, പക്ഷെ സമ്പാദ്യം ഉണ്ടായിരുന്നില്ല.
സിനിമയില്‍ ചെറിയ ചെറിയ വേഷങ്ങള്‍ മാത്രമായപ്പോള്‍, സീരിയലുകള്‍ ചെയ്തു തുടങ്ങി. ആ വരുമാനം കോസ്റ്റിയൂമുകള്‍ക്കും യാത്രകള്‍ക്കും മാത്രമേ തികയൂ. എന്നാണ് ഈ സീരിയലില്‍ നിന്ന് മോചനം എന്നൊക്കെ ചിന്തിച്ച് കരഞ്ഞിട്ടുണ്ട്. ആ സമയത്താണ് പോക്കിരി രാജ എന്ന സിനിമയില്‍ അവസരം ലഭിച്ചത്. അത് ഹിറ്റായി. പിന്നീട് കാര്യസ്ഥന്‍ പോലുള്ള സിനിമകള്‍ കിട്ടിത്തുടങ്ങി. കാര്യസ്ഥന്‍ കഴിഞ്ഞ് നില്‍ക്കുന്ന സമയത്താണ് അസുഖം കൂടി വാപ്പ ഞങ്ങളെ വിട്ടുപോയത്. അതുവരെയും വാടക വീട് തന്നെയായിരുന്നു. അപ്പോഴേക്കും വാടക പതിനാലായിരം രൂപയായി
തുടര്‍ച്ചയായി മൂന്ന് നാല് സിനിമകള്‍ മമ്മൂക്കയ്‌ക്കൊപ്പം ചെയ്യാന്‍ സാധിച്ചതാണ് ജീവിതത്തിലെ ഏറ്റവും വലിയ മാറ്റമുണ്ടായത്. ഒരിക്കല്‍ സെറ്റില്‍ വച്ച് മമ്മൂക്ക എന്നെ അടുത്ത് വിളിച്ചു, 'ഇനിയെങ്കിലും സ്വന്തം കാര്യം നോക്കണം. എന്തെങ്കിലും മാറ്റി വയ്ക്കണം. എന്നും കുടുംബത്തിന് വേണ്ടി ജീവിച്ചിട്ട്, അവസാനം തിരിഞ്ഞ് നോക്കുമ്പോള്‍ ഒരു ബിഗ് സീറോ ആവരുത്. മര്യാദയ്ക്ക് കിട്ടുന്ന പൈസ സ്വരുക്കൂട്ടി വച്ച് ഒരു വീട് വാങ്ങാന്‍ നോക്ക്' എന്ന് പറഞ്ഞു. അതെനിക്ക് ഭയങ്കരമായ സന്തോഷവും അഭിമാനവും തോന്നി. മമ്മൂക്കയെ പോലൊരാള്‍ നമ്മുടെ നന്മയ്ക്ക് വേണ്ടി പറഞ്ഞല്ലോ എന്ന സന്തോഷം. കുടുംബത്തില്‍ ആരെങ്കിലുമാണ് പറഞ്ഞത് എങ്കില്‍ ഞാന്‍ കേള്‍ക്കുമായിരുന്നില്ല. പക്ഷെ മമ്മൂക്ക പറഞ്ഞത് തള്ളിക്കളയാന്‍ സാധിച്ചില്ല.
അതിന് ശേഷം വീട് തിരയാന്‍ തുടങ്ങിയെന്നും ദൈവഭാഗ്യത്തിന് ഞങ്ങളുട കൈയ്യിലെ പൈസയ്ക്ക് ഒത്ത ഒരു ഫ്‌ളാറ്റ് ഒത്തു വന്നുവെന്നും തെസ്‌നി ഖാന്‍ പറഞ്ഞു.
What's Your Reaction?
