ജീവനിൽ കൊതി! കോടികൾചിലവിട്ട് വെടിയുണ്ട തുളയ്‌ക്കാത്ത എസ്.യു.വി ഇറക്കുമതി ചെയ്ത് സൽമാൻ ഖാൻ

ലോറൻസ് ബിഷ്ണോയ് ​ഗ്യാങിൽ നിന്ന് കൊലപാതക ഭീഷണി നേരിടുന്ന ബോളിവുഡ് സൂപ്പർ സ്റ്റാർ സൽമാൻ ഖാൻ ബുള്ളറ്റ് പ്രൂഫ് എസ്.യു.വി വാങ്ങിയെന്ന് റിപ്പോർട്ട്. എൻസിപി എം.എൽ.എ ബാബ സിദ്ദിഖ് കൊല്ലപ്പെട്ടതിന് പിന്നാല സൽമാന് സുരക്ഷ വർദ്ധിപ്പിച്ചിരുന്നു. താരത്തിന്റെ അടുത്ത സുഹൃത്തായിരുന്നു സിദ്ദിഖ്. സുരക്ഷ മുൻനിർത്തി ദുബായിൽ നിന്നാണ് രണ്ടാമത്തെ ബുള്ളറ്റ് പ്രൂഫ് എസ്.യു.വി ഇറക്കുമതി ചെയ്തതെന്നാണ് വിവരം. ബി​ഗ്ബോസ് എപ്പിസോഡുകളുടെ ഷൂട്ടിം​ഗിന് വലിയ സുരക്ഷയിലാണ് താരമെത്തിയത്. രണ്ടുകോടി രൂപയുടെ നിസ്സാന്റെ പെട്രോൾ എസ്.യു.വിയാണ് താരം വാങ്ങിയതെന്ന് ബോളിവുഡ് സൊസൈറ്റി റിപ്പോർട്ട് ചെയ്യുന്നു.

അതീവ സുരക്ഷ സംവിധാനങ്ങളുള്ള എസ്.യു.വിയാണിത്. ഇതിന്റെ ഉയർന്ന നിലവാരമുള്ള സുരക്ഷ സൗകര്യങ്ങളാണ് കാറിന്റെ ഉയർന്ന വിലയ്‌ക്ക് കാരണം. ബോംബ് അലർട്ട് സി​ഗ്നലുകൾ ലഭ്യമാക്കും. പോയിൻ്റ് ബ്ലാങ്ക് വെടിയുണ്ടകൾ തടയാൻ കരുത്തുള്ള ​ഗ്ലാസുകളും കാറിന്റെ പ്രത്യേകതയാണ്. ഇന്ത്യയിൽ ഇതുവരെ ലഭ്യമാകാത്ത കാർ ദുബായിൽ നിന്നാണ് താരം വാങ്ങിയത്. ലോറൻസ് ബിഷ്ണോയ് ​ഗ്യാങിന്റെ പ്രധാന ലക്ഷ്യം സൽമാൻ ഖാനാണ്. കൃഷ്ണ മൃ​ഗത്തെ വേട്ടയാടിയതു മുതൽ ബിഷ്ണോയ് സമുദായത്തിന്റെ കണ്ണിലെ കരടാണ് താരം.