റെക്കോർഡ് വേഗത്തിൽ പാലം, ജീവൻ പണയം വച്ചുള്ള രക്ഷാപ്രവർത്തനം; മുണ്ടക്കൈയിൽ നിന്നും സൈന്യം മടങ്ങി, നന്ദിയറിയിച്ച് കേരളം

ഉരുൾപൊട്ടൽ നാശം വിതച്ച വയനാട് ദുരന്തഭൂമിയിലെ പത്തുനാൾ നീണ്ട രക്ഷാദൗത്യം അവസാനിപ്പിച്ച് സൈന്യം മടങ്ങി. ഹെലികോപ്റ്റർ ഉപയോ​ഗിച്ചുള്ള തിരച്ചിനും ബെയിലി പാലം ശക്തിപ്പെടുത്തുന്നതിനും നിയോഗിച്ചിട്ടുള്ള സൈനികരെ മാത്രം സ്ഥലത്ത് നിലനിർത്തിയാണ് മടക്കം.സൈന്യത്തിന് സംസ്ഥാന സർക്കാരും ജില്ലാ ഭരണകൂടവും ഔദ്യോ​ഗിക യാത്രയയപ്പ് നൽകി. മന്ത്രിമാരായ പി.എ. മുഹമ്മദ് റിയാസും എ.കെ.ശശീന്ദ്രനും പങ്കെടുത്ത ചടങ്ങിൽ വിവിധ സൈനിക വിഭാ​ഗങ്ങളിലെ മേധാവികളെയും ആദരിച്ചു.

തിരുവനന്തപുരം, കണ്ണൂർ, കോഴിക്കോട്, ബെം​ഗളൂരു ബറ്റാലിയനുകളിലെ 500 അം​ഗ സംഘമായിരുന്നു കഴിഞ്ഞ പത്തുദിവസമായി മുണ്ടക്കൈ, ചൂരൽമല മേഖലകളിൽ കയ്യ് മെയ് മറന്ന് രക്ഷാപ്രവർത്തനം നടത്തിയിരുന്നത്. രക്ഷാപ്രവർത്തനം നടത്താൻ പോലും കഴിയാത്ത രീതിയിൽ ഉരുൾപൊട്ടലിൽ ഒറ്റപ്പെട്ടുപോയ മുണ്ടക്കൈ-ചൂരൽമല പ്രദേശങ്ങളെ തമ്മിൽ ബന്ധിപ്പിക്കാൻ റെക്കോർഡ് വേഗത്തിൽ പാലം പണിഞ്ഞതും,അപകടകരമായ സാഹചര്യങ്ങളെ പോലും തരണം ചെയ്ത് കാര്യങ്ങൾ ഏകോപിപ്പിച്ചതുമെല്ലാം ഒരുകാലത്തും മലയാളം മറക്കില്ല.

അതേസമയം രക്ഷാപ്രവർത്തനം പൂർണമായും എൻഡിആർഎഫ്, എസ്ഡിആർഎഫ്, അഗ്നിശമന സേന, പോലീസ് എന്നീ സേനകൾക്ക് കൈമാറുമെന്ന് സൈന്യം അറിയിച്ചു.