വൈകാതെ എല്ലാ കാര്യങ്ങളും തുറന്നുപറയും, ഇപ്പോൾ പരിമിതികളുണ്ട്; ആരോപണങ്ങളിൽ പ്രതികരിച്ച് സുധീഷ്

മലയാള സിനിമയിൽ ഇപ്പോൾ നടന്നുകൊണ്ടിരിക്കുന്ന തുറന്നുപറച്ചിലുകളെ തുടർന്ന് പുലിവാല് പിടിച്ചിരിക്കുന്ന നടന്മാരാണ് സിദ്ദിഖ്, മുകേഷ്, ജയസൂര്യ, റിയാസ് ഖാൻ സുധീഷ് തുടങ്ങിയവർ. ഇപ്പോഴിതാ ലൈംഗിക ചുവയോടെ സംസാരിച്ചുവെന്ന ജൂനിയർ ആർട്ടിസ്റ്റിന്റെ പരാതിയിൽ വിശദീകരണവുമായി എത്തിയിരിക്കുകയാണ് നടൻ സുധീഷ്.

ഒരുകാലത്തും ഒരുവിധത്തിലും താൻ ആരോടും മോശമായി പെരുമാറിയിട്ടില്ലെന്നും എന്നാൽ വിഷയത്തിൽ ഇപ്പോൾ വിശദീകരണം നൽകാൻ പരിമിതി ഉണ്ട് എന്നും വൈകാതെ എല്ലാ കാര്യങ്ങളും തുറന്നു സംസാരിക്കുമെന്നും സുധീഷ് പറഞ്ഞു. തന്നെ അറിയുന്നവരെല്ലാം ഇപ്പോഴും കൂടെത്തന്നെയുണ്ട് എന്നാൽ പൊതുജനങ്ങൾ ഇക്കാര്യങ്ങൾ എങ്ങനെ എടുക്കുന്നു എന്നതിനെക്കുറിച്ച് തനിക്കറിയില്ലെന്നും സുധീഷ് പറയുന്നു.

സുധീഷ് ലൈംഗിക ചുവയോടെ സംസാരിച്ചുവെന്ന പരാതിയുമായി യുവതി രം​ഗത്തെത്തിയതോടെയാണ് താരത്തിനെതിരെ കേസ് എടുത്തത്. കോഴിക്കോട് നടക്കാവ് പൊലീസാണ് കേസെടുത്തത്. 364 (A) വകുപ്പ് പ്രകാരം ലൈംഗികാധിക്ഷേപം നടത്തി എന്നാണ് കേസ്. ഒരുമിച്ച് യാത്ര ചെയ്യാം. ടൂര്‍ പോവാം. ഭാര്യ അടുത്തുള്ളപ്പോള്‍ പതിയെ പറയാം എന്നൊക്കെയാണ് സുധീഷ് പറഞ്ഞതെന്നാണ് ജൂനിയർ ആർട്ടിസ്റ് നടനിൽ നിന്നുണ്ടായ മോശം അനുഭവം പങ്കിട്ട് പറഞ്ഞത്.